Laugardaginn síðastliðinn var haldinn skemmtilegur fræðsludagur hjá úrvalshópum sambandsins, þar sem úrvalshóparnir í áhaldafimleikum hittust, æfðu saman og sóttu fræðslu um næringu íþróttafólks og bandvefslosun. Úrvalshópar í hópfimleikum sóttu einnig fræðsluna, um 50 iðkendur og 15 þjálfarar tóku þátt um helgina.
Agnes Þóra Árnadóttir, íþróttanæringarfræðingur fræddi fimleikafólkið um næringu fyrir, eftir og á æfingum, ásamt því að koma inn á aðra mikilvæga þætti sem snúa að næringu og íþróttaiðkun á efsta stigi. Hekla Guðmundsdóttir hjá bandvefslosun.is fræddi svo fimleikafólkið okkar um mikilvægi bandvefslosunar, sem og fór yfir hvernig best er að hugsa um bandvefinn, en næringin og bandvefurinn haldast einmitt í hendur.
Almenn ánægja var hjá þátttakendum, en skipulögðu landsliðsþjálfarar skemmtilega og fjölbreytta samæfingu þar sem að úrvalshópar unglinga æfðu með úrvalshópum fullorðinna – kepptu úrvalshóparnir í allskonar keppnum sem var virkilega skemmtilegt að fylgjast með.
Skipulögðu starfi úrvalshópa 2025 er því lokið í ár, en boðið verður upp á samæfingar í byrjun næsta árs þar sem að landsliðsþjálfarar endurmeta stöðuna á úrvalshópum og velja hópinn fyrir 2026. Hinsvegin eru landsliðsverkefnum ekki lokið hjá okkur, en þær Sigurrós Ásta Þórisdóttir og Kolbrún Eva Hólmarsdóttir ferðast í fyrramálið til Belgíu, þar sem þær taka þátt á Top Gym um helgina. Agnes Suto, landsliðsþjálfari unglinga og Sæunn Viggósdóttir, dómari verða með þeim í för.
Allar upplýsingar um Top Gym má finna á heimasíðu mótsins og óskum við þeim Sigurósu Ástu og Kolbrúnu Evu góðs gengis um helgina.
Fimleikasamband Íslands þakkar iðkendum, þjálfurum og öllum sem komu að fræðsludeginum um helgina kærlega fyrir þátttökuna og sérstakar þakkir fær Fimleikafélagið Björk fyrir veitta aðstoð um helgina. Að auki viljum við þakka Subway fyrir það að sjá til þess að iðkendur fóru ekki svangir á æfingu á laugardaginn.