Sigurbjörg Fjölnisdóttir hefur tekið við sem formaður Fimleikasambands Íslands eftir að Kristinn Arason sagði af sér á fundi stjórnar þann 19. september sl., en hann hefur setið í stjórn sambandsins frá árinu 2014, lengst af sem varaformaður, eða frá árinu 2015. Kristinn tók við formennsku á Fimleikaþingi 4. september 2021.
Sigurbjörg hefur verið varaformaður sambandsins frá Fimleikaþingi 4. september 2021 og mun gegna hlutverki formanns fram að næsta Fimleikaþingi sem fer fram á Egilsstöðum 27. maí 2023. Stjórn hefur fundað í kjölfar þessara breytinga og hefur Magnús Heimir Jónasson tekið við sem varaformaður og Marta Sigurjónsdóttir tekur sæti í stjórn en hún var áður í varastjórn FSÍ. Aðrir stjórnarmenn eru: Axel Þór Eysteinsson, Halldóra Guðvarðardóttir, Stefanía Reynisdóttir og Þór Ólafsson, ásamt Jarþrúði Hönnu Jóhannsdóttur sem situr í varastjórn.