Frábæru Norður Evrópumóti lokið – Rakel Sara með silfur á gólfi

Keppni á Norður Evrópumótinu í Leicester í Englandi lauk með úrslitum á áhöldum í dag. Ísland átti sína fulltrúa í úrslitum á nokkrum áhöldum sem öll stóðu sig með stakri príði. Upp úr stendur 2. sæti á gólfi kvennamegin þar sem Rakel Sara Pétursdóttir leiddi keppnina framan af.

Rakel Sara bætti sig heldur betur á gólfinu í dag, hún kom inn áttunda í úrslitin í gær og gerði sér lítið fyrir og hækkaði einkunnina sína um 0.700 stig sem telst mikil bæting milli daga. Hún átti ekki eins góðan dag á slánni í dag og í gær þar sem hún kom fyrst inn í úrslit en endaði í sjöunda sæti þar með tvö föll. Á stökkinu varð Rakel Sara fjórða eins og í undanúrslitunum. Þóranna Sveinsdóttir hækkaði sig um þrjú sæti á tvíslánni og var hársbreidd frá bronsinu.

Karlamegin gekk að mestu leyti mjög vel. Atli Snær Valgeirsson var í úrslitum á þremur áhöldum af sex og hækkaði sig um tvö sæti á stökkinu. Hann ætlaði sér meira á gólfi en svekkjandi fall setti strik í reikninginn þar og 7. sætið niðurstaðan. Jón Sigurður hækkaði sig um þrjú sæti á svifránni og var jafn Atla Snæ í 5. sæti með 11.650 stig í dag. Á hringjunum ætlaði Jón sér verðlaunasæti en fall í afstökkinu kom í veg fyrir það. Lúkas Ari Ragnarsson kom inn á hringina sem varamaður og endaði sjötti. Sólon Sverrisson átti úrslita sæti á stökki og tvíslá en dró sig úr keppni á stökkinu þar sem Sigurður Ari Stefánsson kom í hans stað.

Úrslit

Rakel Sara Pétursdóttir

Stökk 4. sæti

Slá 7. sæti

Gólf 2. sæti

Þóranna Sveinsdóttir

Tvíslá 4. sæti

Atli Snær Valgeirsson

Gólf 7. sæti

Stökk 6. sæti

Svifrá 5. sæti

Jón Sigurður Gunnarsson

Hringir 5. sæti

Svifrá 5. sæti

Lúkas Ari Ragnarsson

Hringir 6. sæti

Sigurður Ari Stefánsson

Stökk 8. sæti

Sólon Sverrisson

Tvíslá 6. sæti

Dómarar frá Íslandi á mótinu voru Björn Magnús Tómasson, Ragna Þyri Ragnarsdóttir, Sigurður Hrafn Pétursson og Sæunn Viggósdóttir og fá þau bestu þakkir fyrir að standa dómaravaktina þessa helgina.

Hér má sjá öll úrslit mótsins.

Hér má sjá myndir frá mótinu.

Fimleikasamband Íslands óskar keppendum, þjálfurum og félögum þeirra innilega til hamingju með árangurinn.