Það er með djúpri sorg sem við kveðjum Valdimar Örnólfsson, fyrsta formann og stofnanda Fimleikasambands Íslands og einn af merkustu brautryðjendum íslenskrar íþróttahreyfingar. Með fráfalli hans er horfinn sannur íþróttaáhugamaður og leiðtogi sem helgaði líf sitt uppbyggingu og eflingu íþrótta á Íslandi.
Valdimar fæddist árið 1932 og var alla tíð einstaklega fjölhæfur og ötull íþróttamaður, kennari og stjórnandi. Hann var meðal annars Íslandsmeistari á skíðum og tók þátt í Vetrarólympíuleikunum 1956 þar sem hann bar íslenska fánann við setningarathöfnina. Síðar starfaði hann víða innan íþróttahreyfingarinnar, meðal annars sem íþróttastjóri Háskóla Íslands um áratugaskeið.
Fyrir fimleikahreyfinguna á Íslandi er framlag Valdimars ómetanlegt. Hann var einn af stofnendum Fimleikasambands Íslands og fyrsti formaður þess á árunum 1968–1970 og lagði þar grunn að starfi sem hefur vaxið og dafnað æ síðan. Fyrir störf sín var hann sæmdur heiðursaðild bæði hjá Fimleikasambandi Íslands og Íþrótta- og Ólympíusambandi Íslands, viðurkenningar sem endurspegla djúpstæð áhrif hans á íslenskt íþróttalíf.
Valdimar gegndi jafnframt lykilhlutverki í uppbyggingu íþróttastarfs á landsvísu um áratuga skeið. Hann var formaður Íþróttanefndar ríkisins í tvo áratugi og fyrsti formaður Ólympíuakademíunnar á Íslandi. Þá var hann þjóðþekktur fyrir að stýra morgunleikfimi í Ríkisútvarpinu í fjölda ára og hvatti þannig heila þjóð til hreyfingar og heilbrigðs lífernis.
Það sem einkenndi Valdimar ekki síður en störf hans var óbilandi ástríða fyrir íþróttum og samfélaginu í kringum þær. Hann var ávallt mættur þar sem fimleikafólk kom saman, studdi við bakið á yngri kynslóðum og fylgdist af einlægum áhuga með framgangi íþróttarinnar. Margir minnast hans með hlýju, til að mynda af Evrópumótinu í hópfimleikum sem haldið var á Íslandi árið 2014, þar sem hann var mættur til að fylgjast með og deila gleðinni með fimleikafólki.
Valdimar á Evrópumótinu í hópfimleikum 2014
Missir hans er mikill fyrir íslenska íþróttahreyfingu og ekki síst fimleikasamfélagið. Minning hans lifir þó áfram í starfinu sem hann hjálpaði til við að byggja upp, í fólkinu sem hann hvatti áfram og í þeim gildum sem hann stóð fyrir.
Fimleikasamband Íslands þakkar Valdimari Örnólfssyni fyrir ómetanlegt framlag til íþróttarinnar og sendir aðstandendum hans innilegar samúðarkveðjur.