Select Page

22/05/2021

Stjarnan varði Bikarmeistaratitilinn 6. árið í röð

Bikarmót í hópfimleikum fór fram í Stjörnunni í Garðabænum í dag þar sem kvennalið Stjörnunnar varði Bikarmeistaratitilinn 6. árið í röð.

Kvennalið Stjörnunnar sigraði með 57.3 stigum, en liðið fékk einkunnina 22.5 á gólfi, 17.45 á dýnu og 17.35 á trampólíni. Lið Gerplu varð í öðru sæti með 55.7 stig og Stjarnan 2 í þriðja sæti með 53.25 stig.

Valgerður Sigfinnsdóttir úr Gerplu braut blað í sögu fimleika, þegar hún var fyrsta kona til að keppa með þrefallt heljarstökk með hálfri skrúfu á hópfimleikamóti. Stökkið heppnaðist eins vel og til stóð en sjá má myndband af stökkinu hér fyrir neðan. Valgerður framkvæmdi einnig stökk á hesti sem ekki hefur áður sést á Íslandi í kvennaflokki. Stökkið heitir kasamatsu með heilli skrúfu og er framkvæmt yfir stökkhest.

Í karlaflokki mættu tvö lið frá Stjörnunni til keppni og var það lið Stjörnunnar 1 sem sigraði, með 59.0 stig. Á gólfi hlaut liðið 20.2 stig, á dýnu 19.65 stig og á trampólíni 19.15 stig. Stjarnan 2 fékk 42.6 stig.

Í karlaflokki sást einnig stökk sem aldrei hefur sést á Íslandi áður, en það var Eysteinn Máni Oddsson sem keppti með þrefallt heljarstökk með beinum líkama og hálfri skrúfu. Stökkið er eitt það erfiðasta sem við sjáum á heimsvísu, enda getan í karlaflokki á Íslandi orðin á heimsmælikvarða. Myndbandið má sjá hér fyrir neðan.

Lið Hattar keppti í meistaraflokki B og fékk 42.7 stig.

Við óskum öllum keppendum og þjálfurum til hamingju með árangurinn og daginn.

Fleiri fréttir