Lög FSÍ


Lög Fimleikasambands Íslands

 

I. ALMENN ÁKVÆÐI

1. gr.
Heiti og aðsetur
Sambandið heitir Fimleikasamband Íslands, skammstafað FSÍ. Heimili þess og varnarþing er í Reykjavík.

2. gr.
Hlutverk og tilgangur FSÍ
FSÍ er æðsti aðili fimleikamála innan Íþrótta- og Ólympíusambands Íslands (ÍSÍ) og er hlutverk þess í meginatriðum: 
 að hafa yfirstjórn íslenskra fimleikamála,
 að vinna að eflingu fimleika á Íslandi og sjá um að haldin verði fimleikamót,
 að setja nauðsynleg lög, reglugerðir og reglur og framfylgja þeim,
 að koma fram sem sameiningaraðili fimleikafélaga hérlendis og erlendis,
 að vera í forsvari fyrir fimleikaíþróttina innan vébanda ÍSÍ
 að mennta þjálfara og dómara í greininni,
 að kynna og koma á framfæri þeim breytingum og samþykktum, sem gerðar eru erlendis og breytt geta áherslum í íþróttinni hér á landi,
 að velja einstaklinga, landslið og félög í landskeppni.


3. gr.
Aðildarfélög
Aðild að sambandinu:

Fimleikasamband Íslands er samband fimleikaráða, héraðssambanda og íþróttabandalaga og eru öll félög íþróttahreyfingarinnar, er iðka, æfa og keppa í fimleikum aðilar að FSÍ í gegnum sambandsaðilanaAðildarfélög 

4. gr.
Aðild FSÍ að samtökum
FSÍ er aðili að:
a. Íþrótta- og Ólympíusambandi Íslands (ÍSÍ)
b. Fédération Internationale de Gymnastique (FIG)
c. Union Europeenne de Gymnastique (UEG)
 

II. SKIPULAG FSÍ

5. gr.
Stjórnkerfi FSÍ og hlutverk
a. Fimleikaþing fer með æðasta vald um málefni FSÍ og setur lög.
b. Stjórn FSÍ fer með æðsta vald í málefnum sambandsins milli fimleikaþinga og setur reglugerðir, reglur og framfylgir þeim.
c. Formannaráð sem skipað er stjórnarmönnum FSÍ og formönnum deilda/félaga innan héraðssambanda / íþróttabandalaga / fimleikaráða.
d. Fastanefndir sem vinna samkvæmt lögum og reglum FSÍ.
e. Nefndir sem stjórn er heimilt að skipa milli fimleikaþinga um tímbundin og afmörkuð verkefni.

 

III. FIMLEIKAÞING

6. gr.
Boðun fimleikaþings
Fimleikaþing skal halda fyrir lok júní ár hvert.
Stjórn FSÍ ákveður þingstað og skal boða bréflega til þingsins með minnst átta vikna fyrirvara. Heimilt er að senda boðunarbréf með tölvupósti.
Óheimilt er að halda fimleikaþing á sömu dögum og íþróttaþing eða formannafundir ÍSÍ fara fram.
Aðildarfélögum er óheimilt að hafa mót, sýningar eða aðra viðburði á sínum vegum á sama tíma og fimleikaþing er haldið.
 
7. gr.
Undirbúningur fimleikaþings
Aðildarfélög skulu tilkynna stjórn FSÍ eigi síðar en þremur vikum fyrir þingsetningu um þær lagabreytingar, tillögur og  málefni sem þau óska eftir að verði tekin fyrir á fimleikaþingi. 
Stjórn FSÍ skal eigi síðar en tveimur vikum fyrir þingsetningu senda aðildarfélögum dagskrá fimleikaþings ásamt upplýsingum um viðfangsefni starfsnefnda þingsins, lagabreytingar, erindi og tillögur sem borist hafa, endurskoðaða reikninga sambandsins og starfs- og fjárhagsáætlun næsta starfsárs.
Ef 2/3 hlutar atkvæðisbærra fulltrúa á þinginu samþykkja skal taka fyrir mál sem borist hafa eftir að dagskrá þingsins var send út. Þetta á þó ekki við um lagabreytingar. Erindi /tillögur sem teknar eru inn samkvæmt framansögðu skal vísað í nefnd en raðast aftast í dagskrá nefndar.

8. gr.
Réttur til setu á fimleikaþingi
Fimleikaþing sitja fulltrúar frá aðildarfélögum FSÍ með málfrelsi, tillögu- og atkvæðisrétt og fer hver fulltrúi með eitt atkvæði.
Fjöldi fulltrúa hvers íþróttabandalags eða héraðssambanda á fimleikaþingi ákvarðast af tölu skráðra iðkenda aðildarfélaga/deilda miðað við innsendar starfsskýrslur félaga í FELIX árið á undan, þannig að;
 fyrir fyrstu 50 iðkendur koma 2 fulltrúar,
 síðan 1 fulltrúa fyrir hverja 50 eða brot úr 50 upp í allt að 200 iðkendur,
 þá 1 fulltrúa að auki fyrir hverja 100 iðkendur þar fram yfir.
Héraðssambandi eða íþróttabandalagi er heimilt að senda fulltrúa aðildarfélags/deildar sem fulltrúa á fimleikaþing þótt félagið/deildin er í skuld við FSÍ miðað 1. september fyrir fimleikaþing en þó án atkvæðisréttar á fimleikaþinginu og ber kjörbréfanefnd að ganga úr skugga um að ákvæðinu sé framfylgt.
Á fimleikaþingi eiga auk kjörinna fulltrúa rétt til þingsetu og hafa málfrelsi og tillögurétt:
a) stjórnarmenn FSÍ, aðal – og varamenn, og skoðunarmenn reikninga,
b) nefndarmenn FSÍ,
c) fyrrverandi formenn FSÍ,
d) framkvæmdastjórn og forseti ÍSÍ,
e) framkvæmdastjóri FSÍ,
f) fulltrúi ráðuneytis íþróttamála,
g) aðrir sem stjórn FSÍ telur ástæða til að bjóða.

9. gr.
  Dagskrá fimleikaþings
1) Þingsetning og staðfesting lögmætis þingsins.
2) Kjör þingforseta, þingritara og þriggja manna kjörbréfanefndar.
3) Afhending kjörbréfa. Kjörbréfanefnd hefur störf.
4) Ávörp gesta.
5) Álit kjörbréfanefndar borið undir atkvæði.
6) Fundargerð síðasta þings lögð fram til staðfestingar. 
7) Kosning formanna starfsnefnda þingsins. Stjórn FSÍ skal skipa erindum sem berast þinginu til umfjöllunar í starfsnefndir þingsins. Stjórn getur falið fleiri en einni nefnd að fjalla um einstakar tillögur. Heimilt er að eftirtaldar starfsnefndir starfi á þinginu:
nefnd um áhaldafimleika karla
nefnd um áhaldafimleika kvenna,
nefnd um hópfimleika,
nefnd um almenna fimleika/fimleika fyrir alla,
fræðslunefnd,
laga- og reglunefnd,
fjárhags- og útbreiðslunefnd,
aðrar nefndir samkvæmt ákvörðun þings hverju sinni.
8) Formaður leggur fram skýrslu stjórnar og fastanefnda.
9) Áritaðir reikningar sambandsins lagðir fram og skýrðir.
10) Umræður um skýrslu stjórnar og reikninga sambandsins.
11) Skýrsla stjórnar og reikningar bornir undir atkvæði.
12) Stjórn leggur fram tillögu að starfsáætlun til næstu tveggja ára og vísar til fjárhagsnefndar.
13) Stjórn leggur fram tillögu að fjárhagsáætlun til næstu tveggja ára og skal henni vísað til fjárhagsnefndar.
14) Kynntar breytingar á lögum sambandsins og tillögur sem liggja fyrir þinginu og þeim vísað til umsagnar viðeigandi starfsnefnda þingsins.
15) Starfsnefndir þingsins taka til starfa.
16) Formenn starfsnefnda gera grein fyrir störfum nefnda.
17) Atkvæðagreiðsla um:
a) lagabreytingar,
b) starfsáætlun til eins árs,
c) fjárhagsáætlun til eins árs, 
c) tillögu stjórnar um fjárhæð og fyrirkomulag þjónustugjalda,
d) almennar tillögur.
18) Kosningar.
19) Kosning fulltrúa á íþróttaþing ÍSÍ  
20) Önnur mál.
21) Ávarp formanns.
22) Þingslit.


10. gr.
Atkvæðagreiðsla
Einfaldur meirihluti atkvæða ræður úrslitum mála, nema um lagabreytingar, þá þarf samþykki 2/3 hluta atkvæðisbærra þingfulltrúa.
Þingfulltrúar á fimleikaþingi greiða atkvæði um mál með handauppréttingu. Ef ¼ hluti þingfulltrúa óskar eftir skriflegri atkvæðagreiðslu, skal þingforseti verða við ósk þeirra.
 
11. gr.
Kosning stjórnar.
 Stjórn FSÍ er kosin á fimleikaþingi og hafa allir kjörnir þingfulltrúar atkvæðisrétt. Kosning stjórnar skal fara þannig fram:
a) kosning formanns til tveggja ára, á öðru hverju fimleikaþingi,
b) kosning sex meðstjórnenda, kjörtímabil er tvö ár og skal helmingur meðstjórnenda kjörinn á hverju fimleikaþingi,
c) kosning tveggja manna í varastjórn til eins árs.

Tilkynningar um framboð til formanns og stjórnar FSÍ skulu berast skrifstofu sambandsins minnst tveimur vikum fyrir fimleikaþing. Kjörnefnd er þó heimilt að framlengja framboðsfrest ef nægjanlegur fjöldi hefur ekki tilkynnt framboð sitt innan áðurgreinds frests.

Kosningar til embættisins formann og stjórnar FSÍ eru skriflegar og leynilegar nema frambjóðendur séu jafnmargir og kjósa skal. Þeir sem hljóta flest atkvæði eru rétt kjörnir. Fái fleiri en tveir menn jafnmörg atvkæði skal kjósa á ný um þá. Verði þeir enn jafnir, ræður hlutkesti. Þingfulltrúum er ekki skylt að kjósa þann fjölda sem þarf til að fullskipa stjórn.

Sérákvæði fyrir fimleikaþing 2017
Á fimleikaþingi 2017 skal kosning meðstjórnenda fara þannig fram að fyrst skulu kosnir þrír meðstjórnendur til tveggja ára. Að þeirri kosningu lokinni skulu þrír meðstjórnendur kjörnir til eins árs. Séu fleiri en þrír í framboði til tveggja ára kjörtímabils, skulu þeir sem ekki náðu kjöri eiga þess kost að bjóða sig fram í kosningu til eins árs. Sérákvæði þetta fellur úr lögum eftir fimleikaþing 2017.

12. gr.
Aðrar kosningar.
Kosið er í eftirtaldar nefndir FSÍ  á fimleikaþingi og hafa allir kjörnir þingfulltrúar atkvæðisrétt.
Kosning skal fara þannig fram:
a) kosning tveggja skoðunarmanna reikninga,
b) kosning þriggja fulltrúa og þriggja til vara í kjörnefnd,
c) kosning þriggja fulltrúa og þriggja til vara í laga- og reglunefnd til tveggja ára,
d) kosning formanns fræðslu- og útbriðslunefndar
e) kosning formanns fimleika fyrir alla
f) kosning formanns tækninefndar í áhaldafimleikum karla
g) kosning formanns tækninefndar í áhaldafimleikum kvenna
h) kosning formanns tækninefndar í hópfimleikum
Um kosningarnar gilda ákvæði 3. mgr. 11. gr. 
Fastanefndir FSÍ eru þær nefndir sem tilgreindar eru í stafliðum c) til og með h) lið 2.mgr.

13. gr.
Aukaþing
Aukaþing skal kallað saman ef nauðsyn krefur að mati stjórnar FSÍ eða ef helmingu
 aðildarfélaga óskar þess skriflega við stjórn sambandsins. Boðunar- og tilkynningafrestur  til aukaþings skal vera fjórar vikur. 
Á aukaþingi má ekki gera lagabreytingar og ekki kjósa stjórn, nema bráðabirgðastjórn ef meirihluti kjörinnar stjórnar hefur sagt af sér eða hætt störfum af öðrum örsökum eða ef stjórnin er að eigin dómi óstarfhæf.
Að öðru leyti gilda um aukaþing sömu ákvæði og um reglulegt fimleikaþing.

 
IV. Stjórn FSÍ

14. gr.
Skipan stjórnar FSÍ.
 Stjórn FSÍ skipa sjö menn sem kosnir eru á fimleikaþingi. Formaður er kosinn sérstaklega.  Kjósa skal tvo varamenn meðstjórnenda og skulu þeir taka sæti í stjórn í sömu röð og þeir eru kosnir.
 Skipan og hlutverk stjórnar skal vera eftirfarandi:
 formaður,
 sex meðstjórnendur sem skipta með sér verkum sem hér segir.
 varaformaður,
 ritari,
 gjaldkeri, 
 meðstjórnandi
 meðstjórnandi
 meðstjórnandi

Fastanefndir FSÍ eiga rétt á að tilnefna einn fulltrúa til setu á hverjum stjórnarfundi FSÍ með málfrelsi og tillögurétt. 


15. gr.
Starfstími stjórnar FSÍ, hæfi o.fl.
Starfstími stjórnar hefst að loknu fimleikaþingi. 
Stjórn FSÍ skal að jafnaði funda tvisvar í mánuði en er þó heimilt að fella niður fundi í einn mánuð yfir sumartímann. Ef þrír aðalmenn óska eftir fundi skal boða til fundar. Formaður boðar til stjórnarfundar en getur falið framkvæmdastjóra að sjá um undirbúning funda og boðun. Formaður stýrir fundum. Einfaldur meirihluti atkvæða ræður úrslitum á stjórnarfundi. Verði atkvæði jöfn, ræður atkvæði formanns.  Stjórn er ákvörðunarhæf þegar þrír stjórnarmenn eru viðstaddir fund.
Framkvæmdastjóri skal sitja stjórnarfundi með málfrelsi og tillögurétt.
Stjórnarmenn skulu víkja sæti ef fjallað er um málefni sem valda því að draga megi óhlutdrægni þeirra með réttu í efa.
Fundargerðir stjórnar skal birta á heimasíðu FSÍ innan viku frá fundi. 
Stjórn FSÍ skal setja sér starfsreglur, m.a. um ákvarðanatöku, boðun og stjórnun funda.

16. gr.
Réttindi
Til að tryggja að stjórn FSÍ, aðal- og varamenn, framkvæmdastjóri og aðrir launaðir starfsmenn og nefndarmenn fastanefnda FSÍ geti fylgst með viðburðum á vegum sambandsins og aðildarfélaga, skulu þeir hafa endurgjaldslausan aðgang að öllum fimleikamótum og sýningum sem fram fara innan vébanda FSÍ. Einnig hafa þeir rétt á að sitja aðalfundi aðildarfélaga.
 
17. gr.
Ábyrgð og starfssvið stjórnar FSÍ
Stjórn FSÍ ber ábyrgð á starfsemi sambandsins og fer með framkvæmda- og ákvörðunarvald sambandsins milli fimleikaþinga í samræmi við samþykktir þingsins.
Stjórn FSÍ ber ábyrgð á fjármálum sambandsins og hefur endanlegt ákvörðunarvald um verkefni sem kalla á fjárútlát í samræmi við starfs- og fjárhagsáætlun, s.s. þátttöku í erlendum mótum/viðburðum og önnur verkefni sem kalla á sérstakar fjárveitingar.  Heimilt er að stofna til fjárútláta vegna tilfallandi verkefna ef þau rúmast innan fjárhagsáætlunar.
Stjórn skipar fastanefndir sambandsins og skulu verkefni þeirra skilgreind í starfsreglum settum af stjórn. Aðildarfélögum er heimilt að senda stjórn tilnefningar um nefndarmenn í fastanefndir sambandsins, sbr. fyrirmæli 18. gr. um kosningu í fastanefndir. Hver sá sem hefur áhuga á að starfa í nefndum á vegum FSÍ getur einnig gefið kost á sér til nefndarstarfa.
Stjórn boðar formannaráðsfundi og skulu formenn allra fastanefnda á vegum FSÍ jafnframt vera boðin þátttaka á fundinum.

Löglega settar reglugerðir, reglur og aðrar löglega teknar ákvarðanir stjórnar FSÍ eru bindandi fyrir stjórn, aðildarfélög og nefndarmenn sambandsins innan þeirra marka sem varða verkefni FSÍ. 

V. Nefndir FSÍ

18. gr.
Fastanefndir FSÍ
Á fyrsta stjórnarfundi eftir fimleikaþing skal kjósa í eftirtaldar fastanefndir sambandsins. 
Stjórn skal kjósa:
a)  fjögurra manna tækninefnd karla í áhaldafimleikum,
b)  fjögurra manna tækninefnd kvenna í áhaldafimleikum,
c)  fjögurra manna tækninefnd í hópfimleikum,
d)  fjögurra manna fræðslu og útbreiðslunefnd, 
e)  fimm manna nefnd um fimleika fyrir alla, 
f)  þriggja manna nefnda um fjáröflunar- og markaðsmál.
Formenn nefnda í a, b, c, d og e lið 2. mgr. eru kjörnir sérstaklega á fimleikaþingi og koma til viðbótar tilgreindum fjölda nefndarmanna í hverri nefnd fyrir sig. 
Fastanefndir stjórna í umboði stjórnar samkvæmt lögum og reglum sambandsins. Fastanefndir hafa ekki sérstakan fjárhag eða ákvörðunarvald og er þeim óheimilt að stofna til útgjalda eða skuldbinda sambandið fjárhagslega. Stjórn er þó heimilt að fela nefndum ákveðna ábyrgð sem skal skilgreind í starfsreglum nefnda.
Stjórn setur fastanefndum starfsreglur og hefur eftirlit með störfum þeirra. Í starfsreglum nefnda skal kveðið á um verkaskiptingu innan nefnda, boðun funda, fundargerðir, birtingu fundargerða, hæfi o.fl. Fundargerðir nefnda skulu birtar á heimasíðu FSÍ innan sex vikna frá staðfestingu stjórnar.
Nefndarmenn í nefndum á vegum FSÍ sækja umboð sitt til stjórnar FSÍ og getur stjórn afturkalla það umboð gagnvart einstaka nefndarmanni og eða nefnd í heild sinni og skipað annan nefndarmann í hans stað og eða alla nefndarmenn ef því er að skipta, að frátöldum formanni þeirra nefnda sem kosnir eru sérstaklega á fimleikaþingi.
Stjórn er heimilt að skipa nefndir um tímabundin og afmörkuð verkefni.

19. gr.
Laga – og reglunefnd
 Nefndin er stjórn FSÍ til ráðgjafar um lög og reglur sambandsins. Nefndin fer yfir tillögur að laga- og reglugerðarbreytingum. Nefndin vinnur að öðruleyti þau verkefni sem henni eru falin í starfsreglum.
Kjörnefnd
Nefndin tekur á móti tillögum um skipun í stjórn FSÍ og annarra trúnaðarstarfa sem kosið er til á fimleikaþingi og leggur fyrir fimleikaþing.

 
VI. Formannaráð FSÍ.

20. gr.
Skipan, tilgangur, fundir og starfssvið
Stjórn FSÍ, aðal- og varamenn, og formenn deilda/félaga innan héraðssambanda/íþróttabandalaga/fimleikaráða skipa formannaráð. Það skal kallað saman minnst einu sinni á ári. Stjórn FSÍ ákveður fundarstað og fundartíma. Að jafnaði skal boða til fundar með minnst tveggja vikna fyrirvara.
Formannaráð er ráðgefandi fyrir stjórn FSÍ varðandi starfsemi sambandsins og málefni hreyfingarinnar.
Þeir sem skipa formannaráð skulu senda tilkynningu um málefni sem þeir óska eftir að fjallað verði um á fundinum eigi síðar en viku eftir dagsetningu fundarboðs.
Á formannaráðsfundi skal stjórn FSÍ kynna fyrirhugað starf sambandsins, mót og keppnismöguleika erlendis, skipulag verkefna innan lands og erlendis og kostnaðaráætlun slíkra verkefna. Einnig skulu kynntar breytingar á reglum sambandsins, nýungar og breytingar á regluverki þeirra samtaka sem FSÍ er aðili að og annað er varðar íþróttina og rekstur sambandsins. 

 

VII. Framkvæmdastjóri FSÍ.

21. gr.
Stjórn er heimilt að ráða framkvæmdastjóra með prókúruumboð.

 

VIII. Dómsmál

22. gr.
Dómsmál
Dómsstólar Íþrótta- og Ólympíusambands Íslands hafa lögsögu um þau mál sem upp kunna að koma innan fimleikahreyfingarinnar, samkvæmt 1. grein í lögum um dómstóla Íþrótta- og Ólympíusambands Íslands.

 

IX. Reikningar

23. gr.
Reikningsárið
Reikningsár FSÍ er almannaksárið.
Reikningar FSÍ skulu undirritaðir af stjórn FSÍ,  framkvæmdastjóra og skoðunarmönnum reikninga.

 

X. Ýmis ákvæði

24. gr.
Leyfiskerfi FSÍ
Stjórn FSÍ hefur heimild til að taka upp leyfiskerfi sem taki til iðkenda, þjálfara, keppenda, dómara og félaga. Nánar skal kveðið á um útfærslu á leyfiskerfinu og einstökum þáttum þess, s.s. á skilyrðum einstakra leyfa í reglum sem stjórn setur. 

25. gr.
Reglur og reglugerðir
Stjórn FSÍ setur reglugerðir/reglur um mótahald, félagaskipti, dómararéttindi, viðurkenningar, styrktarfélaga, leyfiskerfi og um annað sem varða rekstur og regluverk sambandsins. 
Reglugerð eða reglur stjórnar FSÍ, sem samþykktar eru af stjórn sambandsins með heimild í b. lið 5. gr.  eða 1. mgr. 25. gr. laga þessara,  og innihalda ákvæði sem leggja fjárhagslegar kvaðir á aðildarfélög, skulu ekki taka gildi fyrr en að fengnu samþykki fimleikaþings.

26. gr.
Breytingar á lögum þessum skulu lagðar fyrir framkvæmdastjórn ÍSÍ til staðfestingar, sbr. grein 46.2 í lögum ÍSÍ. 

27. gr.
Lög ÍSÍ ráða þar sem fyrirmæli skortir í lögum þessum.
 
28. gr.
Lög þessi sem samþykkt voru á fimleikaþingi 13. maí 2016 öðlast gildi við staðfestingu ÍSÍ.
Eldri lög FSÍ falla úr gildi frá þeim tíma.