Þriðjudagur, 24 Október 2017 11:27

Flottur árangur á NEM í Færeyjum

Íslensku karla og kvennalandsliðin áttu frábæran dag í liðakeppninni á Norður-Evrópumótinu (NEM) í Þórshöfn í Færeyjum um helgina.

Á Norður-Evrópumóti eru 5 sem mynda lið, 4 sem keppa á hverju áhaldi og 3 sem telja til stiga í liðakeppni.

Karlaliðið keppti í fyrsta hluta og fékk samtals 226.500 stig fyrir sínar æfingar. Strákarnir gerðu fá mistök og þar sem þau urðu náðu liðsfélagarnir að stíga upp og lauk liðið keppni með ekkert fall.

Biðin eftir úrslitum í síðasta hluta var erfið. Í 2. hluta fóru Norðmenn uppfyrir Ísland með 230.250 stig og í 3. og síðasta hluta var spennan griðarleg og ekki fyrr en á síðasta áhaldi sem ljóst var að karlaliðið yrði af verðlaunasæti þegar Svíþjóð og Skotland fóru uppfyrir þá á töflunni.

Kvennakeppnin var ekki síður spennandi. Íslensku stelpurnar kepptu í 2. hluta og voru í fyrsta sæti að honum loknum. Noregur og Skotland sóttu hart að okkur og höfðu þær norsku að lokum sigur með 0.968 stigum.

Íslensku stelpurnar unnu einnig vel saman sem lið og luku keppni með eitt fall.

Keppnin í dag taldi einnig til úrslita í fjölþrautarkeppninni. Irina Sazonova og Agnes Suto-Tuuha kepptu í fjölþraut í kvennaflokki og Valgarð Reinhardsson, Eyþór Örn Baldursson og Martin Bjarni Guðmundsson í karlaflokki.  Irina hafnaði í 2. sæti og Agnes í því 13. Karlamegin varð Valgarð stigahæstur íslensku strákanna og hafnaði í 8. sæti, Martin í því 11. og Eyþór í 14. sæti.

Ísland náði svo 13 af 20 sætum mögulegum í úrslitum sem fram fóru á sunnudag.

Irina Sazonova keppti í úrslitum á gólfi, slá og tvíslá en átti ekki góðan dag og náði ekki að vinna til verðlauna. Agnes Suto-Tuuha kappti á gólfi og slá og hafnaði í 2. sæti á slánni og Thelma Aðalsteinsdóttir í 2. sæti á tvíslá. Sigríður Hrönn Bergþórsdóttir keppti til úrslita á stökki en náði ekki að vinna til verðlauna.

Í karlakeppninni voru Eyþór Baldursson og Valgarð Reinharðsson í úrslitum á stökki og þar hafnaði Eyþór í 3. sæti.  Jón Sigurður Gunnarsson keppti til úrslita á hringjum og tvíslá. Á hringjum varð hann í 4. sæti og grátlega nálægt því að vinna til verðlauna. Valgarð keppti svo einnig í úrslitum á svifrá, þar sem hann hafnaði í 3. sæti.


Kvennalið Íslands skipuðu Agnes Suto-Tuuha, Dominiqua Alma Belányi, Irina Sazonova, Thelma Aðalsteinsdóttir og Sigríður Bergþórsdóttir. Þjálfarar voru Guðmundur Brynjólfsson og Andrea Kováts-Fellner.  

Karlalið Íslands skipuðu Arnþór Daði Jónasson, Eyþór Örn Baldursson, Jón Sigurður Gunnarsson, Martin Bjarni Guðmundsson og Valgarð Reinhardsson. Þjálfarar voru Róbert Kristmannsson og Viktor Kristmannsson.